နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီးဦးကျော်တင့်ဆွေ ကျူးဘားသမ္မတနိုင်ငံသို့ တရားဝင်ခရီးသွားရောက်၊ ကျူးဘားနိုင်ငံဆိုင်ရာ မြန်မာနိုင်ငံသံရုံးဖွင့်လှစ်မှု အခမ်းအနားကျင်းပ

နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီးဦးကျော်တင့်ဆွေ ကျူးဘားသမ္မတနိုင်ငံသို့ တရားဝင်ခရီးသွားရောက်၊ ကျူးဘားနိုင်ငံဆိုင်ရာ မြန်မာနိုင်ငံသံရုံးဖွင့်လှစ်မှု အခမ်းအနားကျင်းပ

(၇-၁၀-၂၀၁၉ ရက်၊ ဟာဗားနားမြို့)

နိုင်ငံတော်အတိုင်ပင်ခံရုံးဝန်ကြီးဌာန၊ ပြည်ထောင်စုဝန်ကြီး ဦးကျော်တင့်ဆွေသည် မြန်မာနိုင်ငံအစိုးရ၏ အထူးကိုယ်စားလှယ်အဖြစ် ၂-၁၀-၂၀၁၉ ရက်မှ ၅-၁၀-၂၀၁၉ ရက်အထိ ကျူးဘားနိုင်ငံသို့ တရားဝင်ခရီးစဉ်သွားရောက်ခဲ့သည်။
ပြည်ထောင်စုဝန်ကြီး၏ခရီးစဉ်အတွင်း ၃-၁၀-၂၀၁၉ ရက်တွင် ကျူးဘားနိုင်ငံ ဒုတိယသမ္မတ Mr. Roberto Morales Ojeda နှင့်လည်းကောင်း၊ ကျူးဘားနိုင်ငံ ပြည်သူ့ကျန်းမာရေးဝန်ကြီးဌာန၊ ဝန်ကြီး Mr. Jose Angel Portal Miranda နှင့်လည်းကောင်း သီးခြားစီ တွေ့ဆုံခဲ့ပါသည်။ ထို့နောက် ၄-၁၀-၂၀၁၉ ရက်တွင် ကျူးဘားနိုင်ငံခြားရေးဝန်ကြီး Mr. Bruno Eduardo Rodriguez Parrilla နှင့် တွေ့ဆုံခဲ့သည်။

ဒုတိယသမ္မတ Mr. Roberto Morales Ojeda နှင့်တွေ့ဆုံရာတွင် နှစ်နိုင်ငံအကြား နိုင်ငံရေးနှင့် စီးပွားရေးဖွံ့ဖြိုးတိုးတက်မှုဆိုင်ရာကိစ္စရပ်များ၊ နှစ်နိုင်ငံဆက်ဆံရေး တိုးမြှင့်ရေးနှင့် နှစ်နိုင်ငံအကြား ကျန်းမာရေးကဏ္ဍတွင် ပူးပေါင်းဆောင်ရွက်မှု ပြုလုပ်သွားမည့်ကိစ္စများနှင့်ပတ်သက်ပြီး အမြင်ချင်းဖလှယ် ဆွေးနွေးခဲ့ကြပါသည်။ ထို့ပြင် ပြည်ထောင်စုဝန်ကြီးက ကျူးဘားနိုင်ငံဆိုင်ရာ မြန်မာသံရုံးအား ၄-၁၀-၂၀၁၉ ရက်တွင် ဖွင့်လှစ်မည်ဖြစ်ကြောင်းကိုလည်း အသိပေးခဲ့ပါသည်။

ကျူးဘားနိုင်ငံ ပြည်သူ့ကျန်းမာရေးဝန်ကြီးဌာန၊ ဝန်ကြီး Mr. Jose Angel Portal Miranda နှင့် တွေ့ဆုံရာတွင် နှစ်နိုင်ငံအကြား ကျန်းမာရေးကဏ္ဍ ပူးပေါင်းဆောင်ရွက်ရေးနှင့်ပတ်သက်၍ ဆေးနှင့် ဆေးပစ္စည်းထုတ်လုပ်ရေး၊ လူ့အရင်းအမြစ်ဖွံ့ဖြိုးတိုးတက်ရေးနှင့် သုတေသနလုပ်ငန်းများတွင် ပိုမိုပူးပေါင်းဆောင်ရွက်သွားနိုင်မည့် အခွင့်အလမ်းများကို ဆွေးနွေးခဲ့သည်။ ကျူးဘားနိုင်ငံခြားရေးဝန်ကြီး Mr. Bruno Eduardo Rodriguez Parrilla နှင့် တွေ့ဆုံရာတွင် မြန်မာ-ကျူးဘား နှစ်နိုင်ငံအကြား ဆက်ဆံရေးနှင့် ပူးပေါင်းဆောင်ရွက်မှု တိုးမြှင့်ရေး၊ ကုန်သွယ်ရေးနှင့် စီးပွားရေးပူးပေါင်းဆောင်ရွက်မှု တိုးမြှင့်ရေး၊ ကျန်းမာရေးကဏ္ဍတွင် ပိုမို ပူးပေါင်းဆောင်ရွက်သွားရေး၊ နှစ်ဖက်ထိတွေ့ ဆက်ဆံမှုမြှင့်တင်သွားရေး၊ မြန်မာအစိုးရမှ ကြိုးပမ်းဆောင်ရွက်လျက်ရှိသည့် ရခိုင်ပြည်နယ် တည်ငြိမ်အေးချမ်းရေးနှင့် အမျိုးသား ပြန်လည် စည်းလုံးညီညွတ်ရေးလုပ်ငန်းများကို ဆွေးနွေးခဲ့ကြသည်။ ထို့ပြင် ကျူးဘားနိုင်ငံဆိုင်ရာ မြန်မာသံရုံး တည်ထောင်ဖွင့်လှစ်နိုင်ရေး ကျူးဘားနိုင်ငံခြားရေးဝန်ကြီးဌာနမှ ပံ့ပိုးကူညီခဲ့မှုများအတွက် မြန်မာနိုင်ငံအစိုးရအနေဖြင့် ကျေးဇူးတင်ရှိကြောင်းကိုလည်း ပြောကြားခဲ့ပါသည်။

ပြည်ထောင်စုဝန်ကြီးသည် ၄-၁၀-၂၀၁၉ ရက်၊ ညနေပိုင်းတွင် ပြုလုပ်သည့် Melia Cohiba Hotel ၌ ကျင်းပသော ဟာဗားနားမြို့၊ မြန်မာသံရုံး ဖွင့်လှစ်သည့် ဧည့်ခံပွဲအခမ်းအနားသို့ တက်ရောက်ပြီး အဖွင့်အမှာစကားပြောကြားခဲ့ပါသည်။ အမှာစကားပြောကြားရာတွင် ကျူးဘားနိုင်ငံဆိုင်ရာ မြန်မာသံရုံးဖွင့်လှစ်မှုသည် မြန်မာ-ကျူးဘားဆက်ဆံရေးကို အလေးထားပြီး၊ ပိုမိုမြှင့်တင်ရန် ရည်ရွယ်သည့် ဆောင်ရွက်မှုဖြစ်ကြောင်း၊ နှစ်နိုင်ငံအကြား ပူးပေါင်းဆောင်ရွက်မှုနှင့် ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ အခွင့်အလမ်းများလည်း ပိုမိုရရှိနိုင်မည်ဖြစ်ကြောင်းဖြင့် ထည့်သွင်းပြောကြားခဲ့သည်။ သံရုံးဖွင့်ပွဲသို့ ကျူးဘားနိုင်ငံ ဒုတိယနိုင်ငံခြားရေးဝန်ကြီး Mr. Rogelio Sierra Diaz တက်ရောက်ပြီး အမှာစကားပြောကြားခဲ့ပါသည်။ အခမ်းအနားသို့ အာဆီယံအဖွဲ့ဝင်နိုင်ငံများ၏ သံရုံးများမှ သံအမတ်ကြီးများအပါအဝင် ဟာဗားနားမြို့ အခြေစိုက် အခြားသံရုံးများမှ သံအမတ်ကြီးများ၊ သံရုံးအကြီးအကဲများနှင့် ကျူးဘားနိုင်ငံခြားရေးဝန်ကြီးဌာနမှ တာဝန်ရှိသူများ တက်ရောက်ခဲ့ကြသည်။

မြန်မာသံရုံးကို ကျူးဘားနိုင်ငံ၊ ဟာဗားနားမြို့၌ ဖွင့်လှစ်နိုင်မှုသည် မြန်မာ-ကျူးဘား နှစ်နိုင်ငံ ဆက်ဆံရေးကို ပိုမိုတိုးတက်ခိုင်မာစေသည်သာမက ကာရေဘီယံဒေသတွင်းရှိနိုင်ငံများနှင့် မြန်မာနိုင်ငံတို့အကြား ဆက်ဆံရေးကိုလည်း တိုးမြှင့်ဆောင်ရွက်သွားနိုင်မည် ဖြစ်ပါသည်။
ပြည်ထောင်စုဝန်ကြီး ခေါင်းဆောင်သော ကိုယ်စားလှယ်အဖွဲ့သည် ဟာဗားနားမြို့မှ ၅-၁၀-၂၀၁၉ ရက်တွင် ပြန်လည်ထွက်ခွာခဲ့ကြောင်း သိရှိရသည်။

Similar News